沙頭角的故事

我係以前沙頭角官立中學的老師，係呀，我想代表官校老師講個故事。在未執笠之前，學校的公開試目標係每科「破蛋」（不要0%合格）！有新老師來了兩年，第一次發會考成績單後，畀校長傳召「照肺」，以為凶多吉少，誰知校長劈頭第一句「X Sir，恭喜哂呀，你嗰科有22%合格，破哂紀錄，以前最多都係個位數，今次兩位，仲要高過20，Good Job，well done！以後繼續努力。」

但回想兩年前初來報到，第一日上堂的光景，猶有餘悸，教的是選修科，同學來自學行最差的兩班，有「四大人渣」「四大魔女」（唔係老師改花名，係佢地出黎「行」嘅自我介紹），當中三分一來自沙頭角，來自粉嶺和上水又各佔三分一，都是中三被簁走，該區冇人收嘅，當中浩仔係班中大佬，因為佢係沙頭角陀地，上水粉嶺猛虎不及地頭蟲，新老師唔知佢要揚刀立威，第一個禮拜就因為課堂秩序同佢開火，我要求佢幫手安撫啲譟動嘅同學仔，佢話「你以前都冇教過我，做乜要聽你話，做乜要畀面你？」

我火了便鬧佢「唔係好人」，點知哩句話點中左佢死穴，（佢初中非常壞，後來經幾位老師同媽媽耐心教導，佢應承做「好人」），立馬站直接近六呎的身軀，衝了出來，望著老師一兩秒，突然轉向，一拳打在敝校特有的鋼絲玻璃窗（因敝校學生破壞力驚人，免碎片墮地傷及無辜），然後跑出了課室，望著蛛網般的玻璃窗，老師的心也裂成一塊塊，食花生的同學「阿Sir，你好彩喇，佢以前唔係打玻璃架！」

我唯有拿出電話（敝校容許老師開電話，較震mode，在必要時call馬支援）通知教員室空堂同事，不是找專職的訓導老師，因為全校都係訓導！結果，五六個湧到課室，兩個睇住課室內的學生，一個安慰我，兩三個自認同浩仔有交情嘅，自告奮勇，全校地氈式搜索浩仔。
結果找到了，接著由幾個浩仔信得過嘅老師犧性空堂輪流安撫他（他全日沒有再回課室），其中一個提醒我今日不要找浩仔，留待大家冷靜下來才傾偈，我同意。

過了兩天，同事告訴我可以和浩仔傾偈了，便在小食部「偶遇」，我要求的第一件事是看看傷口，他很溫馴地讓我握住右手，發覺偒口無大礙，我鬆了一口氣，接下來的都是很老土的訓勉，他全程垂頭沒有回答，只是點頭同意賠一塊玻璃給學校，我沒有記佢缺點甚麼的，他同意再犯兩次一齊計數。

事件中，我很多謝支援的同事，反應快速、無私、自願而且習以為常，很有默契，分工合作，崗位清楚，好一個團隊！

接著兩年，浩仔偶然聽書，一累了便趴下睡覺，其他同學有樣學樣，我沒有打攪他們，費事刺激他們，犯眾怒，每每趁著這檔子趕緊教其他未睡的同學，功課測驗即堂做即堂收，最緊要寫上名字，做幾多隨緣（不能讓他們帶回家，一定唔見），改考試卷時間，全班40人未試過超過半小時！Last day，每人送上本人精選當屆貼題，兼有埋合乎程度嘅簡單答案，誰知放學後，工友在課室櫃筒找到三十多份，其中一份留有墨寶「阿Sir，你想我地溫書？好難喇！」（真的感激冇粗口）

後來在操場撞到浩仔，他當時身上裇衫滿是老師和同學的題字，心想「寃家路窄」？誰知他一把拉住我，「阿Sir，簽個名」，我照做，誰知他又說「阿Sir，攬攬！」我照做，當兩個男人扭在一起時，我很自然的在他耳邊說了一句「浩仔，對唔住，哩兩年冇乜教到你。」
誰知浩仔竟說「唔關你事嘅，我自己唔學啫！」

眼睛一下子模糊了，想起這兩年在課室裏的悲苦經營，估唔到最明白我最體諒我嘅，居然係浩仔！不禁熱淚盈眶，由於不想畀浩仔見到我眼濕濕，好十幾秒我不能放開浩仔，但他也沒有推開我，我雙手感覺到他兩個膊頭正在抽搐！

氣血翻湧一輪後，大家都冷靜下來，便分開，垂頭不望對方，握手告別。浩仔當屆會考零分。
接著幾年，浩仔一有空便大包小包的又壽司又西餅的回校請老師吃，當然他第一位招呼的老師不是我，不要忘了他中三或之前冇畀我教過，佢地好講交情深淺，當然派剩就有我份喇！

那天和他一起坐東鐵出市區，傾了好耐，原來他做了大車行維修技工，公司很欣賞，想送佢去德國受訓，但由於英文唔得，公司出學費要佢上夜校，他後悔當年冇好好學習。
問他有女友未，他狡猾地說了一個名字，噢，一個低佢兩屆嘅靚師妹，我教過的，問她近況，「做緊化妝小姐」，正當職業。

雖然我們這班Band 3官中老師做唔起間學校（仲執埋），又冇本事教到起死回生，令學生由Band 3扶搖直上，在公開試大放異采，入埋大學做神話，但我地以教出一班好人、自食其力嘅好公民，感到自豪。仗義每多屠狗輩，官中老師有君子（唔係講自己，係講嗰班一個眼色，便一齊行動嘅同事！）"

（長文，慎入）